مرارتى اتفقعت

بصراحة يعنى من السياسة الى تعامل الشعب المصرى معاها هيجيبوا اجلى.. ليه بقى.. علشان من رصد ما يحدث فقط خلال الشهر المنصرم لازم الواحد يطق.. ونبدا بالرصد على حسب الذاكرة...: 1. السيد رئيس الجمهورية بيصلى وبيخطب فى الناس خلال صلاة التراويح فى المسجد 2. السيد الرئيس لا يزال يصلى.. فاضل يعتكف فى رمضان بالمرة ومفيش مياه او كهرباء.. الناس عمالة بتصوت,,, فهل من مجيب! 3. دهشور.. احدى قرى الصعيد... مكوجى حرق قميص .. تحول الامر الى حرب شنعاء وتهجير مواطنين من القرية!! فى قانون .. اه بتاع زينب!!! 4. واحد ضرب واحدة فى مترو الانفاق علشان صورته فى عربية الستات .. طب بيركب فيها ليه! 5. اللطيف بقى ان احنا كلنا على اختلاف نظرتنا السياسية التحليلية الجبارة للامور عايزين نعيش فى التاريخ بدل الواقع.. مش عارفة هل ده لو علاقة بان احنا دولة قديمة زيادة شوية واللا ايه.. ظواهر الحالة دة تلاقيها فى الآتى. أ. السلفى عاوز يرجع لايام الرسول صلى الله عليه وسلم ويحارب الجاهلية ب. انصار الملكية هارينا صور عن زمان ايام الملك كان مصر كانت عايشة ازهى عصورها والمصريين متمتعين .. وما كانش فى فساد او بوليس سياسى او احتلال او فلاحين معدمين ج. الناصريين عاوزين يرجعوا الحلم الناصرى وكأن كان فيه ديمقراطية ومفيش قمع ولا حروب ولا اصلا القومية العربية اللى بنؤمن بها لها وجود دلوقتى د. بعض الاقباط عاوزين يرجعوا لايام الرومان لما مصر كانت قبطية ومفهاش المسلمين اللى عاملين كل وجع الدماغ ده وكان ما كانش فى نيرون وقتها بيموت فى المصريين! ه. الاخوان المسلمين عاوزين يرجعوا الخلافة للجزيرة العربية وكأن ملوكها هما عمر واللا ابو بكر! و. الساداتيين... هريينا صور للسادات وحرب اكتوبر.. وكأن مش هو اللى رجع سينا من غير سلاح ومعملش انفتاح هبب الاقتصاد اكتر ومش هو اللى فتح الباب للجماعات الاسلامية لضرب اليساريين ز. اللى بيحب مبارك خايف يكمل خناق لكن برده قرفونا بان الحال كان احسن.. وكان المليون ونصف فى المقابر دول عاشوا هناك من ايام الفراعنة واللا الفشل الكلوى والكبد الوبائى والسرطان اللى منتشر بسبب تلوث كل حاجة فى البلد والناس مش لاقية لا تاكل ولا تلبس ولا تتعالج ولا تعلم ولادها ماكانش بسببه اما بعد .. مع ابطال الغرض من اغنية عمرو دياب ما بلاش نتكلم فى الماضى.. فنضيف بقى عدد من الظواهر اللى بتكمل فقع المرارة... أ. الرجالة يطلعوا صورة لبنت حلوة ولابسة بحمالات ويهيصوا ويشتموا فى الستات المصريات .. يعنى يا خى انت وهو مين ورا منعهم من ان يروحوا للكوافير ويدلعوا!!! الحكومة واللا انتم ب. البنات زعلانة قوى من التحرش ولا تتخذ اى اجراء ايجابى.. مستنية ايه يا حلوة انتى وهى الفارس اللى على الحصان الابيض علشان ينقذك! ج. في ناس زعلانة من تقبل كذب الرئيس وقبله صلاح ابو اسماعيل.. مش فاهمة ليه.. يعنى هو احنا مش شايفين الانهيار القيمى اللى حوالينا وان الناس طول النهار بتكذب عمال على بطال! يعنى الكذب عادى خلاص! د. الناس كلها عمالة تصلى وتصوم وشغالة زى البوليس على اى حد مش ملتزم قوى وكان بقى الصلاة بتاعتك انت وهو حولتكم لملايكة.. امال بقى مين اللى بيرتشى ومش بيشتغل بما يرضى الله!! اموت واعرفه! الناس بتاخذ رشوة تعمل بها عمرة او تاكل مال الغلابة بالسحت والربا الفاحش وتبنى جامع!!! ه. ناس كتير قوى زعلانة علشان الجيران وعلشان بورما اللى فى آخر الدنيا.. يعنى خلاص عندك الحياة مبقاش فيها ولا مشكلة وكل اللى شاغل بالك سوريا وبورما!!! ياعم احنا مش لا قيين ناكل وبقى فى حرب شوارع وضرب النار فى قارعة الطريق فى وضح النهار ومفيش كهرباء والاطفال بتموت من الحر فى الحضانات ومفيش مياه والريحة طلعت .. خليك فى بورما يا خى .. ما تروح تحارب مع القبائل المسلمة هناك! ودى بعض الحاجات القليلة اللى تفقع المرارة .. واللا لا؟؟ متتفقعشى!